Post by Sandra Youssef

**"Victory belongs to the most tenacious"** *"النصر للأكثر مثابرة"*، ودة الشعار اللي مكتوبة في ملاعب رولان جاروس، واحدة من أكبر بطولات التنس في العالم. وأنا بتفرج على ماتش بين لاعب عنده 39 سنة، بخبرة وسنين طويلة من المنافسة، ولاعب شاب عنده 19 سنة ولسه بيبني اسمه وعايز يثبت نفسه وسط أفضل لاعبي العالم، لقيت نفسي بفكر إننا كلنا شبههم بشكل أو بآخر. كل واحد فينا عنده هدف بيسعى له. في ناس بتحاول تحافظ على نجاح حققته، وناس تانية بتحاول تثبت نفسها وتاخد فرصتها. لكن في النهاية، اللي بيجمعنا كلنا هو السعي والمحاولة والاستمرار. بس أنا لو هكمل على الجملة دي، هقول: **"النصر للأكثر مثابرة، والأكثر قابلية للتعلم، والأكثر تواضعًا."** لأن من أهم أسباب النجاح في التنس إنك تدرس اللي قدامك كويس، تتعلم من نقاط قوته، وتفهم إزاي تتعامل مع نقاط ضعفه. ونفس الفكرة في حياتنا المهنية. كل شخص حوالينا عنده حاجة ممكن نتعلمها منه. وكل خبرة بنقابلها فرصة إننا نكبر ونتطور. وفي نفس الوقت، لما حد يسألنا أو يحتاج مساعدتنا، يبقى عندنا استعداد نشارك اللي عرفناه واتعلمناه. لأن النجاح الحقيقي مش إنك تبقى أحسن واحد في المكان، لكن إنك تفضل بتتعلم، وتساعد غيرك يتعلم، وتسيب أثر كويس وراك. **المثابرة بتوصلك، لكن التعلم والتواضع هما اللي بيخلوك تكمل وتنجح على المدى الطويل.** 🎾✨