Post by Ragy Ramadan, REP®

من 14 شهر بالظبط، NoorNation كانت فازت في مسابقة أهّلتنا للعرض في معرض كبير خاص بالطاقة في مصر + الحصول على برنامج mentorship أونلاين مع خبراء في الطاقة وريادة الأعمال دخلوا معايا ساعتها أول أونلاين سيشن عملت فيها pitching وخلص الوقت بتاعها بسرعة جدا وحقيقي ملحقتش احصل منهم أي feedback أو كان نقاش عام جدا.. وعشان أنا كنت ساعتها في الامارات وبنركب LifeBox™ جديد في قلب الصحراء - قبل السيشن التانية كلمت زميلتي Carole Fahim استأذنتها تحضر السيشن وتتعلم من ال mentors العظماء دول عشان يدعمونا في رحلتنا وده بدالي مؤقتا لأني اتزنقت في الموقع مفيش شبكة قوية كفاية لميتنج أونلاين ولا شحن في موبيلي أو لابي وقالتلي حاضر يا بشمهندس ولا يهمك لما كارول حضرت السيشن مع ال mentors دول - واللي البعض منهم بيطلق على نفسه لقب مستثمر "ملائكي" - وحتى بعد ما كارول شرحت لهم ظروفي - زعلوا جدا ونزلوا سلخ في كارول انه فين راجي؟ ومين انتي ودورك أيه؟ وليه كل الطلبات (أو الأوامر!) اللي قلنا عليها في أول سيشن متعملتش في ال pitch deck وان احنا بنضيع وقتنا معاكي وازاي أصلا المؤسس ميحضرش بنفسه؟ وأنتم مش عارفين قيمتنا ولا أيه؟! واحنا وقتنا مهم وازاي تضيعوه؟! لدرجة انه بعدها كارول رجعت كلمتني وهي مصدومة بسبب ردة فعلهم المبالغ فيها وتهزيقهم لي ولها بدون أي داع أول امبارح NoorNation مش بس أصبحت من أوائل شركات الطاقة والمياه المصرية اللي تحضر وتعرض وتمثل مصر في قمة تكنولوجية عظيمة زي GITEX AFRICA في مراكش، لأ كمان الحمد لله أتأهلت ووصلت لنهائيات تحدي سوبر نوفا على هامش المؤتمر ومع شركات عملاقة من العالم كله وفوزنا في فئة الاستدامة والتكنولوجيا الزراعية وحصلنا على جائزة 10 آلاف دولار وحقيقي ال pitch بتاعتنا هزّت الموتمر كله لدرجة إن كل إعلام مراكش تقريبا جه يصور معانا وده لأن المغرب فعلا بلد عنده أزمة كبيرة في المياه وبالنسبة لهم نورنيشن ابتكار في أشد الحاجة اليه مين بقا اللي حضر المؤتمر وكان بيمثلنا هناك لوحده في بووث صغير وبيعدي عليها آلاف الناس وفي نفس الوقت تروح بليل تحضر لل pitch؟ أيوا بالظبط هي كارول في سنة واحدة اتبعت خطة مع كارول انها تفهم كل حاجة عن نورنيشن من الفنيات الى الإستثمار واستثمرنا فيها بكل قوتنا (وبعض أعضاء الفريق) عشان يمثلوا نورنيشن وكأنهم نسخة (بل أفضل) من الشركاء المؤسسين نفسهم! نورنيشن كسبت جوائز كثيرة جدا محلية وإقليمية ودولية، ولكن الانتصارات اللي بيعملها فريق نورنيشن (بأقل تدخل من المؤسسين) هتفضل أعظم انجازات الشركة! وده يا جماعة اللي عايز أقوله 👇 والله العظيم بناء التيم والاستثمار فيه في قمة الأهمية والله العظيم مفيش scalability هتحصل لشركة من غير تيم قوي متأسس والله العظيم مش ضروري (بل ميصحش) إن كل event زي مسرعة أعمال ولا احتضان ولا معارض ولا حتى pitch لمستثمرين مش ضروري (بل عيب) إن المؤسسين هم اللي لازم يحضروا ويبصموا حضورهم كبر التيم بتاعك بدري - اقضي وقت مع التيم بتاعك كثير - استثمر فيهم مال وجهد بكل ما أوتيت من قوة - أديهم أولوية - اعملهم delegation تاني..مفيش نمو وعمر ما البيزنيس بتاعك هيتحول من شركة ناشئة الى مؤسسة ناجحة الا ببناء التيم عين دلوقتي - كبر الفريق بدري واستثمر في الكفاءات حالا! يا جماعة هفضل دايما أقول "فريق العمل هو أهم عميل عندك" مبروك علينا ومبروك زميلتي العزيزة المجتهدة Carole Fahim ويلا اللي بعده وعقبال نجاحات أكثر لسنين طويلة باذن الله شكرا من القلب لأعظم فريق شركة طاقة شمسية ومياه في أفريقيا كلها والشرق الأوسط كافة :)