Post by Osama Allam

صباح الخير أو مساء الخير، حسب ما حضرتك بتشوف البوست ده. ❤️ حابب أعرفك على نفسي في البداية، بما إنك دخلت صفحتي الشخصية. أنا اسمي أسامة أحمد محمد علام، وقررت بعد تفكير إني أبدأ أشارك مع حضراتكم بعض النجاحات والتحديات اللي واجهتني كشاب مصري بالغ من العمر 25 سنة، وده حسب اللحظة اللي أنا بكتب فيها البوست ده. ببساطة، حبيت أعمل كده على غير عادة أغلب مستخدمي LinkedIn اللي بيعتبروه مجرد منصة لمشاركة المشاريع الشخصية أو الإنجازات العملية والعلمية، وأسأل الله أن يبارك لكل شخص بيسعى لتحقيق أحلامه ويعينه على ذلك. لكن الإضافة اللي هقدمها هي إني مش هشارك الإنجازات العلمية والعملية دي فقط، بل هشاركها بشكل أكثر تفصيلًا، وهحكي القصة لأي حد حابب يتعرف على الشخص اللي دخل على بروفايله الخاص، علشان يكون عارف الشخص اللي بيتعامل معاه وعقليته عاملة إزاي. ولعل وعسى، إذا أراد الله واتعاملنا مع بعض في يوم من الأيام، تكون على دراية بمعظم التفاصيل اللي ممكن تفرق في تعاملنا؛ لأنني على تمام الثقة بأننا كأشخاص مش مجرد Portfolio متحرك، بل إحنا طباع وصفات وطريقة تفكير اندمجت مع مادة علمية، ومهارات معينة، ودراسة، وتجارب حياتية مختلفة. وكون الشخص اللي قررت تثق فيه وتتعامل معاه كعميل، أو HR، أو صديق، أو حتى زائر فقط لصفحته، هو أنا، فده شرف كبير ليا. وإن شاء الله، كل بوست هيكون ليه قصة، ومعلومة، ودرس جديد اتعلمته في مرحلة عمرية معينة، وحشاركك تفاصيله بكل صدق وشفافية. وطبعًا، مرحب بكل الآراء والنصائح، سواء حابب تشاركها في كومنت أو برايفت، فأكيد معنديش أي مشكلة، بل على العكس، هكون سعيد جدًا بيها. ❤️