Post by Omair Alkhateeb

يمكن أول اعتراف لازم نبدأ فيه هو إننا كنا مقصرين بحق لينكدإن. كنا عارفين أهمية هالمنصة، بس ضغط الشغل، الدراسة، وكثرة الالتزامات خلّتنا نأجل الظهور هون لفترة طويلة. بس اليوم حسّينا إنه الوقت مناسب نشارككم خطوة مهمة بالنسبة إلنا. بعد أكثر من 3 سنوات من العمل بالخفاء، صار اسمنا اليوم رسميًا شركة مرخّصة في ألمانيا باسم: Axis Core Management أنا وشريكي المهندس عبد الرحيم Abdulrahim Rmaih بلشنا هالرحلة كفريق برمجي صغير، نشتغل بصمت، نجرّب، نغلط، نتعلم، ونبني مشروع ورا مشروع… لحد ما وصلنا لهالمرحلة. بهالثلاث سنين، ما كان الموضوع مجرد تنفيذ مشاريع. كان في رحلة كاملة من التجارب، العلاقات، التحديات، القرارات الصعبة، واللحظات اللي خلتنا نفهم أكتر شو يعني نبني شركة، مو بس فريق. تعلمنا كيف نسمع السوق، كيف نفهم المستخدم، كيف نحول الفكرة لمنتج، وكيف نتحمل مسؤولية الشغل لما يكبر، ولما يصير في ناس وشركات معتمدة علينا. اشتغلنا بأسواق مختلفة، منها الكويت، مصر، والعراق، وكل تجربة منهم علمتنا شي جديد عن السوق، المستخدم، وطريقة بناء منتجات فعلًا قادرة تخدم الناس وتكبر. وما فينا نحكي عن هالرحلة بدون ما نذكر المملكة العربية السعودية. السعودية كانت البلد اللي أخذت النصيب الأكبر من شغلنا خلال السنوات الماضية، وكانت من أكثر الأسواق اللي تعلمنا منها. سوق سريع، طموح، مليان فرص، وفيه مستوى عالي من التوقعات، وهذا الشي خلانا نكبر مهنيًا، ونتعلم كيف نبني منتجات قادرة تواكب مستخدم واعي وسوق عم يتطور بسرعة كبيرة. وخلال هالسنين، اشتغلنا على أكثر من 7 مشاريع ضخمة موجهة للمملكة العربية السعودية، بعضها رح نشارككم تفاصيله بالمستقبل القريب، وبعضها للأسف العقود ما بتسمح نذكر اسمه. بس فينا نقولها بطريقة ألطف: لو كنت مقيم بالسعودية، في احتمال كبير تكون جربت تطبيق من شغلنا بدون ما تعرف 😄 واليوم، حبينا يكون أول إعلان رسمي إلنا مو مجرد إعلان عن مشروع جديد، بل إعلان عن بداية مرحلة جديدة باسم Axis Core كشركة رسمية. مرحلة فيها اسم واضح، مسؤولية أكبر، ورؤية أوضح. ومن ضمن هالمرحلة الجديدة، عم نشتغل على أول مشروع يتم تنفيذه تحت اسم Axis Core كشركة رسمية: Rassah رَسّة هو مشروع موجه للمملكة العربية السعودية، وفكرته ببساطة إنه يخلق مساحة اجتماعية ذكية حوالين الفعاليات والتجارب الواقعية. بس ما رح نحكي عنه كتير بهالبوست، لأن البوست القادم بإذن الله رح يكون مخصص بالكامل لـ Rassah، فكرته، رؤيته، وليش مؤمنين إنه ممكن يضيف تجربة مختلفة للمستخدمين. اليوم، القصة الأكبر هي إن Axis Core صارت كيان رسمي بعد سنين من الشغل الهادئ بعيد عن الأضواء. وصار فينا نشارككم موقعنا الرسمي: https://axiscore.de/ ومعلومات الشركة التجارية عالميا: Axis Core Management Ust-IdNr: DE459440165 وطبعًا، هالرحلة ما كانت فردية. خلال هالسنوات، اشتغل معنا ومرّ معنا ناس كتير: مطورين، مصممين، مدراء مشاريع، مختصين تسويق، وأشخاص وثقوا فينا بوقت ما كان اسمنا لسا فريق صغير عم يحاول يثبت حاله. كل شخص كان جزء من هالرحلة، بطريقة مباشرة أو غير مباشرة، إله أثر حقيقي بهالمرحلة اللي وصلنالها اليوم. لسا الطريق طويل، بس اليوم بنقدر نقول إننا بلشنا مرحلة جديدة بثقة أكبر، باسم رسمي، وبرؤية أوضح. شكرًا لكل شخص كان جزء من هالرحلة، سواء بدعم، ثقة، نصيحة، فرصة، أو شغل حقيقي معنا على الأرض. والقادم بإذن الله أقوى.