Post by Mohammad Rashad I COLP

شوفت الفيديو المتداول لأحد "الاستشاريين" الكبار وهو بيحكي على انترفيو مع أحد المرشحين لوظيفة ما (في المبيعات). بغض النظر عن وجهة نظري الشخصية بخصوص الاستشاري بشكل عام .. انا هتكلم عن الموقف اللي حضرته حكاه فقط. المرشح دخل سلم عليه وقعد. الاستشاري (بطريقة لوم): انت قعدت ليه؟ المرشح: يعني ايه يا فندم؟ الاستشاري: الايتيكيت بيقول ان طول ما انا مقلتلكش اقعد، يبقى تفضل واقف. المرشح: بعني ايه؟ يعني انا هعمل الانترفيو وانا واقف؟ الاستشاري: الايتيكيت بيقول كده، لو انا عايزك تقعد هقولك اقعد غير كده تفضل واقف. المرشح سابه ومشي وقال للسكرتيرة الناس اللي جوه معندهمش ذوق. وحكى ان حد تاني قال مخدتش بالي وقام وقف (وده معجبوش برضه) وحد تالت عمل الصح (من وجهة نظره) وقال حضرتك معاك حق .. انا غلطان وقام وقف. انا مش محتاج أعلق كتير، أنا بس هقول اللي اتعلمته من أستاذي ومعلمي Mustafa Refaat Newaisar: "اللي جايلك عشان الانترفيو ده ضيف عندك من أول ما يدخل لغاية ما يمشي، سواء اتقبل أو لأ، شوف لما يبقى في ضيف جايلك هتتعامل معاه ازاي" طبعا من حقك انك تختبر رد فعل المرشح في مواقف مختلفة، ولكن الموقف اللي تيجي فيه على كرامته بالشكل ده؟؟ طيب جرب تبقى مكانه .. وبالمناسبة انت متوقع انه يقابل الموقف ده في الماركت؟ العميل مثلا هيقوله انت قعدت ليه، قوم اقف؟ كم من جرائم ترتكب في المقابلات الوظيفية من أول الأسئلة اللي بتتسأل من غير ما يبقى اللي بيسأل عارف الهدف من وراها، مرورا بمحاولات الاستفزاز اللي زي دي، إلى محاولات الاستعراض على المرشح، والتفاوض الغير عادل على الراتب واستغلال احتياجه للوظيفة .. وغيرها كتير. درس واحد فقط من كل ده .. مش أي حد مؤهل لعمل مقابلات التوظيف. للتذكرة فقط: الانترفيو ده ممكن يبقى ربع ساعة من يومك، انما هو حياة كاملة لإنسان بقاله كام يوم غرقان في التفكير فيه، وبيحلم بالشغلانة دي، صحي يفكر فيها، عمال يجهز هدومه ونزل يدعي ومخلي أهله يدعوله بالتوفيق عشان الربع ساعة دي. حتى لو مش هيتقبل بس متتسببش في جرحه أو قهرته. خليك إنسان. #learning_wizard