Post by Mohamed Ali
CMA | FP&A & Business Performance Consultant | Financial Reporting | Financial Modeling | Feasibility Studies | Helping Businesses Build Strong Financial Systems & Drive Better Business Decisions
روشتة محاسبية (1) 🩺 #إعدام_الديون هتعمل إيه لو جالك قرار إداري فى الشركة بإعدام دين من رصيد العملاء ؟!! النهارده حصل معايا الموقف ده فعلًا... وأول ما شوفته، اكتشفت إن الموقف ده لسه جديد على بعض الزملاء حديثي التخرج، فقلت أكتب المعالجة هنا يمكن تفيد أي حد يقابله لأول مرة. طيب... قبل ما نعدم الدين أصلًا، لازم نسأل سؤال مهم. المخصص ده اتكوّن إزاي؟ طبقًا لمعيار المحاسبة المصري رقم (47) المتوافق مع IFRS 9، بيتم تكوين مخصص خسائر الائتمان المتوقعة (Expected Credit Losses - ECL). بيتم تكوين مخصص مخاطر ائتمان بناءً على دراسة بيعملها مكتب متخصص ومعتمد، وبتعتمد على أعمار الديون وطبيعة مخاطر كل عميل. لو انت مش مكون مخصص قبل كده ودي year 1 بالنسبالك وجالك المكتب المختص وقالك المخصص المطلوب = 100 مثلا، المعالجة المحاسبية بتكون: 100 من ح/ مصروف خسائر الائتمان المتوقعة - ده بيروح لقائمة الدخل P&L 100إلى ح/ مخصص خسائر الائتمان المتوقعة - ده بيروح الميزانية Balance Sheet طيب... السنة اللي بعدها؟ لو المخصص المطلوب زاد إلى 110، المعالجة بتكون: 10 من ح/ مصروف خسائر الائتمان المتوقعة 10 إلى ح/ مخصص خسائر الائتمان المتوقعة ولو انخفض إلى 95: 5 من ح/ مخصص خسائر الائتمان المتوقعة 5 إلى ح/ ايراد رد مخصص خسائر الائتمان المتوقعة طيب... صدر قرار إعدام الدين. هنا عندنا 3 حالات. الحالة الأولى - المخصص أكبر من قيمة الدين مخصص = 100 ، دين معدوم = 30 30 من ح/ مخصص خسائر الائتمان المتوقعة 30 إلى ح/ العملاء الحالة الثانية - وده وارد جدا يحصل ... المخصص أصغر من الدين مخصص = 100 ، دين معدوم = 130 من مذكورين: 100 ح/ مخصص خسائر الائتمان المتوقعة 30 ح/ مصروف ديون معدومة 130 إلى ح/ العملاء يعني الفرق بين المخصص والدين المعدوم بيتحمّل مباشرة على المصروفات. الحالة الثالثة - مفيش مخصص من الأساس 30 من ح/ مصروف ديون معدومة 30 إلى ح/ العملاء طيب... ورجعنا فى سؤال، هل ينفع عميل سجل دينه معدوم... يرجع يسدد؟! أيوة بينفع، وبيحصل أكتر مما ناس كتير متخيلة، لكن المعالجة بتختلف حسب توقيت السداد. لو السداد في نفس الفترة المحاسبية: نعكس قيد الإعدام أولًا، ثم نسجل قيد السداد المعتاد. لو السداد في فترة محاسبية لاحقة: من ح/ العملاء إلى ح/ إيراد ديون معدومة مستردة ،،، لاحظ إحياء الدين بعد الإعدام هو إيراد. ثم قيد السداد العادي: من ح/ البنك إلى ح/ العملاء بالمناسبة المعالجة دي يمكن اختصارها في قيد واحد: من حـ/ البنك إلى حـ/ إيراد ديون معدومة مستردة بس انا بميل للمعالجة الأولى !! الخلاصة... القيد المحاسبي مش هو القصة !! المعالجة الصح هي اللي بتحافظ على عدالة القوائم المالية، وبتمنع تحميل مصروف مرتين أو إظهار الأرباح بشكل غير صحيح. وده الفرق بين محاسب بيرص قيود ... ومحاسب فاهم ليه القيد ده اتعمل. هذا والله أعلى وأعلم. لو حابين نشرح عمليا ازاي مصفوفة المخصصات (Provision Matrix) بتتعمل بناء على فترات استحقاق وأعمار الديون اكتبولي فى التعليقات. أخوكم #طبيب_المشاريع #المحاسبة #IFRS9 #Accounting #الديون_المعدومة #معايير_المحاسبة #المحاسبة_المصرية #CreditRisk #حديثي_التخرج #FreshGraduate