Post by Mayada Hamam

أنت مش مصباح علاء الدين! تقريبًا دي أكتر جملة بترن في دماغي من أول ما سمعتها في Entrepreneurs Café اللي كان في Creativa Qena واللي قدمته بشمهندسة ‏Rehab Saeed Abdelemam‏ (حابة أشكر حضرتك جدًا على اليوم المُثمر والمفيد ده) بشمهندسة رحاب كانت بتكلمنا عن إزاي نلاقي أفكار مشاريع، وقالت الجملة دي، واللي كانت قصداه: إن أي حل مش هيحل مشكلة كل الناس. وأنا حسيت الجملة متوجها ليّا شخصيًا.. وده يمكن لأني طول الوقت بحاول أعمل كل حاجة في نفس الوقت وأحاول اطلعها بأفضل شكل.. أذاكر، أتعلم مهارات جديدة، أشارك في أنشطة وتطوع، أفكر في مشروع له أثر حقيقي، أساعد اللي حواليا، وأفضل ماشية من غير ما أغلط أو أقصر. ومع الوقت بدأت أحس إني فعلًا متوقعة من نفسي حاجات فوق طاقتي.. يمكن عشان كده، وأنا بحضر باقي السيشن، حسيت إن كل الأفكار بتأكد نفس المعنى، وإن حتى في ريادة الأعمال مش الشرط إن يبقى عندك حل سحري، لكن إنك تفهم المشكلة كويس، وتختار المشكلة اللي تقدر تحلها فعلًا، وتبدأ بخطوة صغيرة بدل ما تستنى الفكرة الكاملة أو الحل المثالي. واتكلمنا عن إن مفيش قرار مثالي طول الوقت، لكن فيه قرار مناسب بيتاخد بعد ما نفكر في البدائل ونجرب ونتعلم. خرجت من السيشن بفكرة بسيطة، لكنها مريحة جدًا بالنسبالي: مش مطلوب مني أحقق كل حاجة مرة واحدة أو بسرعة، لكن ممكن أبدأ بخطوة صغيرة، وأحل مشكلة واحدة، واشتغل بالتوازي وبدون ضغط كبير على نفسي. 🤎 وأعتقد إن دي كانت الرسالة اللي كنت محتاجة أسمعها في الوقت ده بالذات. وده أكيد مش كل اللي خرجت بيه من Entrepreneurs Café، لكن ده موضوع البوست الجاي إن شاء الله.🤎 #Entrepreneurship #LearningJourney