Post by Marielle C.

🇭🇹🇭🇹 GRENADYE AK CHAK 12yèm JWÈ NAN ESTAND LA : ALASO ! BOULÈT SE POUSYÈ ! 🇭🇹🇭🇹 Rezilta yè swa a pat sa nou te espere. Men istwa Ayiti pa janm ekri ak viktwa fasil. Li ekri ak kouraj, ak sakrifis, ak detèminasyon, ak kapasite yon pèp pou kontinye vanse menm lè tout bagay sanble kont li. Sa fè plis pase de syèk depi sou chan batay Vètyè, François Capois, nou konnen kòm Capois-la-Mò, tap mache anba kout zam ak kout kanon lènmi yo. Yon boulet fè chwal li tonbe. Yon lòt pote chapo li ale. Èske li te fè bak? Èske li te pè? Èske li te vire gade dèyè? Jamè. Li rale epe li, li kanpe pi dwat toujou, epi li rele byen fò: « En avant, en avant, boulèt se pousyè ! » Jodi a, pawòl sa yo pa sèlman pou listwa nou. Yo se pawòl chak Grenadye ki pote koulè Ayiti yo sou teren an. Yo se pawòl chak sipòtè ki pote Ayiti nan kè li. ⚽ POU GRENADYE NOU YO SOU TEREN AN Yon rezilta pa defini kiyès nou ye. Yon echèk pa retire valè nou. Yon move swa pa efase rèv nou ni avni nou. Nou pote plis pase yon mayo. Nou pote espwa yon pèp. Nou pote fyète yon nasyon. Nou pote eritaj fanm ak gason ki te refize lage lè lage te sanble pi fasil. Souke pousyè a. Leve tèt nou. Gade tribin yo. Gade drapo a. Gade dè milyon Ayisyen, lakay kou aletranje, ki toujou kwè nan nou. Epi kontinye vanse. An avan. 🇭🇹 POU CHAK 12yèm JWÈ KI NAN ESTANT LA OSINON A DISTANS: SIPÒTÈ YO Nou pa senp espektatè. Nou pa senp obsèvatè. Nou fè pati ekip la. Nou se vwa ki leve lè fòs kòmanse febli. Nou se enèji ki chase dout. Nou se souf ki raple jwè nou yo yo pa janm poukont yo. Vrè sipòtè pa abandone apre yon batay difisil. Yo kanpe pi fèm. Yo chante pi fò. Yo kwè pi plis. Yo rete la. Paske se konsa Ayisyen ye. Paske se sa ki nan san nou. Paske chak echèk se sèlman pousyè. Ansanm nou selebre. Ansanm nou soufri. Ansanm nou leve. Ansanm nou vanse. Yon Ekip. Yon Drapo. Yon Pèp. Yon Lame. 🇭🇹 AYITI PAP PLIYE ! 🇭🇹 ⚽ GRENADYE YO ALASO ! ⚜️ Linyon Fè Fòs. #GrenadierAlaso #12emeHomme #HaitiFootball #BouletSePousye #CapoisLaMort #Haiti #WorldCup2026