Post by Mahmoud Bishr

نصباية ال FEA و ال CFD من كام يوم اتصل بيا مدير مشروع قاللي فيه تعديل محتاجينه على معدة و احنا جبنا شركة تعمل التعديل ده على المعدة في السايت في ماليزيا و عايزينك تبص على التقرير قبل ما الشركة تنفذ. لقيت التعديل عبارة عن حاجتين اولا تقصير طول المعدة يعني هيقصوا منها حتة و التاني عبارة عن انهم هيلحموا مكان تثبيت لاسطوانة هيدروليك بدل اللي اتكسر قبل كدة. لاقيتهم عاملين نفس التصميم اللي اتكسر قبل كدة مع العلم انه هيركب عليه نفس الاسطوانة الهيدروليك. طب ماهو كدة هيتكسر تاني! لاقيتهم باعتين من غير ما نطلب منهم تقرير فيها التعديل و فيه fea عن التحميل اللي هيحصل على الاجزاء اللي هيعدلها. المفاجأة ان التقرير مطلع ان الاجهاد اعلى من ال yield بتاع الحديد و كاتب في اخر التقرير انه تمام و انه طالب الموافقة عشان يشتغل. اكيد يشتغلنا! قمت رازعو واحدة ايه القرف ده و عدلت على التصميم لانه مش مسئول عن التصميم و قولتلو احنا مطلبناش fea فلو هتعمله تطلعلي ان الاجهادات اقل من yield الحديد او متعملهوش خالص. انا كنت اوردي عدلت التصميم وواثق فيه و مش هينفع اابرف على ريبورت طالع فيه ان الجزء هيتكسر. فيا اما متعملوش خالص يا اما تجيبوا سليم. المهم هو عدل فعلا التصميم و بعتلي بردو fea report جديد و بردو مطلع ان الاجهاد عالي! رفضت الريبورت و قولتلو ال fea محتاجة تتعدل و لازم الاجهاد يكون اقل. بعتلي يقولي ان ال nodes اللي فيها اجهاد عالي دي singularities و انها متتحسبش و ناخد الاجهاد من النود اللي جنبها. طبعا ده كلام اونطة. انا عارف ان المشكلة في ال grid اللي زي القطران اللي هو عاملها. هو مش عامل اي turning لل mesh و واخد ال default بتاعة البرنامج اللي كان ساعتها Ansys. طبعا انا اشتغلت سنين على Ansys و اعرف اتشقلب فيه و انا مغمض عيني. بينما هو فاكرني عبيط هيبعتلي اي عبط في الريبورت و صور الوان حتى لو الصور بتقول البتاع هيتكسر فعلا و هو فعلا اتكسر. المهم انا الزبون و الزبون دايما على حق 😀 دوست على وشه لحد ما صغر ال grid شوية في الحتت اللي بيطلع فيها اجهاد عالي و الدنيا ظبطت و وافقنا عالتعديل و الدنيا مشيت. الشاهد في الموضوع ان دي مش اول مرة يتعرض عليا ريبورتات fea فيها نصب بس المرة دي كانت زيادة شوية. عادة بيكونوا grid اي كلام و boundary conditions تعبانة و طبعا بيكون فيه عامة poor physics definitions. راي كثير من الخبراء - وانا متفق- ان فعليا في كثير من الاحيان بتكون التجربة الفعلية أرخص من بناء موديل fea or cfd. انا شخصيا تقريبا معداش عليا ولا مرة تقرير fea or cfd في الصناعة معمول بحق ربنا. عشان تبني موديل مظبوط اولا لازم تعرف المسألة بطريقة صحيحة مع كثير من التبسيط الغير مخل بالمسألة و ده محتاج سنس مهندسين اشتغلوا بايديهم و فاهمين ال physics. ثانيا لازملك مجموعة من ال parameters & factors اللي حقيقة بيأثروا على الحل بصورة قوية. عادة لازم تجيبهم بطرق اختبارية. ثالثا بعد ماعرفت المسألة و جيبت شوية الفاكتورز اللي بيأثروا عليها لازم بقى تبتدي تدخل في الحل الرقمي و تشوف ازاي الرقمنة بتأثر على الحل و ازاي تنقي موديل بيبرز الحل اللي انت محتاجه. رابعا لازم تتاكد ان الموديل بتاعك بيحل بطريقة صح او شغال كما ينبغي ان يكون. خامسا لازم تتاكد من صحة اختيارك للموديل ده و مناسبته للمسألة دي. سادسا بقى لازم تعرف تعرض النتايج مظبوط بحيث تقدر تعبر بيها عن المعنى الهندسي للحل. غير كدة مش بقدر اثق في النتايج و بشوف الجملة الشهيرة Garbage in Garbage out. #CFD #FEA #SIMULATIONS