Post by Mohamed El Ghaissani

علاش 90% ديال الناس كيسحاب ليهم الذكاء الاصطناعي غير موجة وغادي تدوز، فلوقت لي المهندسين والخبراء والشركات كيشوفوه بحال شي سحر وكيدخلو بيه الملاير؟ 🚨 هاد التناقض شرحو واحد من أكبر علماء الـ AI فالعالم Andrej Karpathy، ولخصو فواحد الفكرة كنشوفها يوميا فالشركات عندنا فالمغرب. قالك كاينين جوج أنواع ديال الناس لي كيخدمو بالذكاء الاصطناعي اليوم: النوع الأول: صحاب الشفوي هادو كيخدمو الـ AI فمهام لي صعيب تعبرها واش صحيحة ولا غالطة، بحال كتابة المقالات، الإيميلات، أو الأفكار. ملي الـ AI كيزلق فشي معلومة تافهة، هاد الموظف كيسد البيسي وكيقول: "هادشي غير تخربيق ومزال ناقص". المشكل ماشي فالآلة، المشكل أن "الأسلوب" مسألة أذواق، ومايمكنش للآلة تقيّم واش المقال واعر ولا حامض بشكل أوتوماتيكي بلا ما يراجع إنسان موراه. وهادشي كيخلي التطور فهاد المجال بطيء. النوع الثاني: صحاب القاسح هادو هما الناس الناضيين لي فاهمين اللعبة. كيستعملو الـ AI فمهام قابلة للقياس 100% بحال البرمجة Coding والرياضيات. هاد النوع فهم بلي: 1- المعيار واضح: فالبرمجة والرياضيات ماكاينش "كثرة الهضرة"، الكود إما خدام إما مخدامش (1+1=2). هادشي كيخلي الـ AI يتيستي ويصحح راسو أوتوماتيكيا مليارات المرات فالثانية بلا ما يحتاج بنادم يراجع موراه. 2- التطور الصاروخي: حيت النتيجة قابلة للقياس (الأمان، السرعة، البساطة)، الـ AI كيتطور فهاد المجالات بواحد السرعة كتخلع المبرمجين براسهم. 3- لغة المارشي: الشركات اليوم مستعدة تحط الملايين باش تخلص حلول تقنية، أتمتة Automation، وتحليل ديال الداتا لي كيوفر الوقت والفلوس.. ماشي باش تخلص واحد كيزوق ليها الإيميلات. الخلاصة: الـ AI ماشي مكلخ، نتا لي محاصرو فالشفوي وكثرة الهضرة.. نهار غتخدمو كقيمة فعالة فمهام حقيقة وقابلة للقياس، غتشوف العجب وغتطلع قيمتك فالسوق. وأنتوما، فاش كتستعملو اليوم الـ AI كثر فخدمتكم؟ واش فـ "الشفوي" (كتابة، أفكار) ولا فـ "المعقول" (تحليل داتا، أتمتة، برمجة)؟ #المدير #Lmodir