Post by Harm Meter

Kolòm – Braderia den Nos Bario Pa Harm Meter (for di Hulanda) Djasabra nos tabata kana trankil riba e braderia den nos bario. Durante sinku siman, tur djasabra ta fiesta. Kaya ta yen di stèntnan, turista ta buska bon oferta, i e holor di piska fresku, stroopwafel i nues karamelisá ta kubri e bario manera un manta kaloroso. Hendrikus i Gerda tabata presente tempran. No pasobra nan mester kumpra algu, sino pasobra mitar di e bario ta ei. Un braderia ta e úniko lugá kaminda bo por topa un hende ku bo no a mira pa dies aña, ku mesora ta bisa: —Mi no ta mira bo mas nunca! No a pasa ni sinku minüt, Bertus i Griet a yega, sigui pa Gezienus i Jantje, ku nan ruman Truida tras di nan. Truida a disparsé mesora den e stèntnan di paña di damanan. Un kuartu ora despues el a bini bek ku tres saku grandi, mientras ku el tabata insistí ku: —Mi tabata wak nomás. Mientras tantu, e òrgel di kaya hulandes a sigui toka su kantikanan ku hopi alegria. —Kon e òrgel aki a kuminsá realmente? —Bertus a puntra.— Mi no por rekordá un tempu ku no tabatin un. —Den tempu di promé tabatin un na kasi tur skina di kaya —Hendrikus a splika.— E homber di òrgel tabata kana ku su gorra pa pidi un chikí sèn na hende ku tabata skucha. Pero e no tabata solamente kolektá plaka; e tambe tabata e motor di e òrgel. Mester tabata draai e rueda ku man na e ritmo hustu. Si e draaimentu no tabata pareu, e músika lo zona manera ku e òrgel a traga un pida haring sin masti'é. —Esei sí tabata un arte di berdat —Bertus a bisa, mientras el a move su kabes. —Awor un motor eléktriko ta hasi e trabou —Hendrikus a sigui.— Asta e òrgel di kaya no por a skapa di e automatishon. Pero, sin importá kon moderno teknologia bira, e músika di òrgel lo keda semper un parti di Hulanda. Hendrikus a para un rato pa sigui skucha. —Dushi, no? —Si —Bertus a kontestá—, pero e ta toka mes kantika pa di tres biaha kaba. —Esei ta berdat —Hendrikus a hari—, pero nos tambe ta hasi mes kos. Kada aña riba e braderia nos ta konta mes kuentunan. I realmente e tabatin tur rason. Ora Gerda i Griet a bishitá mes stènt pa di tres biaha, i Gezienus a bolbe konta ku su bromfiets bieu tabata kore 120 kilometro pa ora... bahando seru, ku bientu patras i un empuhon di e bishin... mi a komprondé. Un braderia no ta trata realmente di kumpra kos. Ta trata di kana wak, papia ku hende, bolbe skucha kuentunan bieu i, spesialmente, hasi manera ku bo no a gasta niun sèn. Mientras tantu, Truida ta kana kas ku kuater saku yen di kumpra i ku un kara serio ta bisa: —Tur kos tabata na oferta. Niun hende no a kere'é... fuera di su amigo, ku afortunadamente no ta mira e resibunan nunca.