Post by fatma zohra hiba boudis

كاين أشخاص يثبتولك بلي المشكل ماشي في العمر… المشكل في واش نآمنو به على رواحنا و صح يطبقوا مقولة : “ Quand on veut, on peut " كنت نقري سيدة في أواخر الأربعينات تطوير المواقع 👩‍💻 حياتها كاملة خدمت كمحاسبة في شركة عمومية و ماعندها حتى علاقة بالتكنولوجيا ولا بالبرمجة ولا بتطوير المواقع ونتفكر في أول الحصص كانت بعض الحوايج لي نشوفوها بسيطة جداً تحتاج وقت باش تتعرف عليها. بصح الحاجة لي لفتت انتباهي ماكانتش المستوى تاعها في البداية كانت الرغبة تاعها في التعلم كل مرة تلقى صعوبة تحاول من جديد و كل مرة تغلط تعاود وكل مرة تحس باللي الأمر معقد تكمل وما تحبسش شوية بشوية بدات تفهم أكثر، وتجرب أكثر، وتولي تعتمد على روحها أكثر واليوم تقدر تخرج موقع بيديها لهذا كي تجيني وحدة تقولي “أنا خاطيني التكنولوجيا” أو “عمري كبير باش نتعلم” نتفكرها مباشرة لأن الواقع لي شفتو قدامي هو أن السن ماكانش هو العائق العائق الحقيقي غالباً يكون الخوف من البداية برك. كاين ناس عندهم 20 سنة ويقنعوا رواحهم بلي ما يقدروش، وكاين ناس عندهم 50 سنة ويتعلموا مهارات جديدة ويخرجوا من منطقة الراحة تاعهم كل يوم يمكن لهذا السبب نحترم بزاف الناس لي يقرروا يتعلموا حاجة جديدة مهما كان العمر تاعهم، لأن البداية من الصفر ماشي سهلة، وتحتاج شجاعة أكثر مما يبان للناس. وكل مرة نشوف شخص بدا خطوة جديدة رغم الخوف تاعو نتأكد بلي الإرادة تقدر توصل الإنسان لأماكن ماكانش يتخيلها أصلاً