Post by Dr.Yasminna Reda

من أكتر الحاجات اللي اتعلمتها في الحياةإن مش كل الناس هتفرحلك. في فترة من حياتي، كنت فاكرة إن طالما نيتي صافية، وبحب الخير للناس، فده الطبيعي اللي هلاقيه منهم. لكن مع الوقت اكتشفت إن القلوب مش شبه بعض، وإن استقبال الناس لنعمة غيرهم بيختلف على حسب اللي جواهم، مش على حسب اللي عندك. ممكن حد يشوف نجاحك، فيبتسم قدامك لكنه من جواه يتألم، لأن نجاحك فكّره بحلم هو لسه مأجله، أو بفرصة ضيعها، أو بمقارنة بيهرب منها. وساعتها، بدل ما يواجه نفسه، يبدأ يقلل منك، أو يتجاهل تعبك، أو يحاول يقنع نفسه إن اللي وصلتله مش كبير. وده مش جديد لما سيدنا يوسف عليه السلام حكى رؤياه لأبيه، قال له سيدنا يعقوب عليه السلام: ﴿يَا بُنَيَّ لَا تَقْصُصْ رُؤْيَاكَ عَلَىٰ إِخْوَتِكَ﴾ مش لأن الرؤيا غلط... لكن لأن مش كل قلب يقدر يستقبل النعمة بنفس الصفاء. وبعدين ظهرت الحقيقة لما قال إخوته: ﴿لَيُوسُفُ وَأَخُوهُ أَحَبُّ إِلَىٰ أَبِينَا مِنَّا﴾ المشكلة ما كانتش في يوسف... المشكلة كانت في المقارنة اللي كبرت جواهم، لحد ما تحولت لحسد، ثم لقرار ظلم. وده درس مهم جدًا. أوقات كتير، ردود أفعال الناس عليك بتعبر عن صراعهم هم، أكتر ما بتعبر عنك أنت. علشان كده، بطل تستغرب إن فيه ناس مش هتفرحلك، أو هتضايق من تقدمك، أو هتقلل من إنجازاتك. ده لا يقلل منك ولا معناه إنك ما تستحقش الخير. النضج الحقيقي إنك تكمل طريقك من غير ما تستنى تصفيق الجميع، ومن غير ما تربط سلامك النفسي برأي الناس فيك. اعرف قيمة النعمة اللي ربنا رزقك بيها، واشكره عليها، وادعُ للناس بالخير، لكن متستناش إن كل القلوب تكون صافية. لأن مش مهم إن الجميع يحبك المهم إنك تفضل محافظ على قلبك، وما تسمحش لردود أفعال الناس إنها تغيّر الشخص اللي أنت عليه. #fekrghany #dr_yasminnareda