Post by Dr.Mona Moustafa Elashry- M.M.E

ليه معملش رسالتي بمرجعين زي جون ناش؟🤔 ​أول ما الباحث بيبدأ يفكر في الماجستير أو الدكتوراة، بيسأل نفسه سؤال منطقي جداً: ليه أوجع دماغي وأقرا عشرات الدراسات السابقة؟ ليه أمشي ورا كلام قديم وأقتل إبداعي؟ ما جون ناش أخد الدكتوراه بمرجعين بس! ​ولو انت باحث في الإدارة أو العلوم الاجتماعية، ممكن جداً تقول: يا جماعة، أنا لاحظت مشكلة واقعية في بيئة العمل، وهستخدم المنهج الاستنباطي (Deductive approach) عشان أحلها من الملاحظة والواقع.. ليه بقى ترغموني أرجع لأبحاث اتعملت من سنين؟ ​السؤال ده مهم فعلا، بس الإجابة عليه محتاجة نغير نظرتنا تماماً لمفهوم الدراسات السابقة.. ​لسه فاكرة كويس جداً وأنا في مرحلة إعداد رسالتي للدكتوراة، كنت بجمع أي معلومة وأي دراسة تقع تحت إيدي ليها علاقة بمتغيرات بحثي وأضيفها، كنت معتقدة ان اي معلومة لها علاقة بالمتغيرات يبقى اضيفها في الرسالة. وقتها المشرف على رسالتي لفت نظري، وقالي: "خدي بالك.. إنتي مش بتكتبي كتاب، إنتي بتعملي رسالة!.. وهو بصراحة كان عنده حق جدا، مش كل حاجة نلاقيها نضيفها للرسالة، لازم يكون لها دور اوضح به فكرتي ورؤيتي.. ​بقيت بشوف الباحث كأنه رسّام واقف أمام لوحة بيضاء (اللي هي مشكلة البحث). الدراسات السابقة دي مش لوحات جاهزة إنت بتشفّ منها وتقلّدها.. لأ، الدراسات السابقة دي هي "علبة الألوان والفرش" اللي أنت بتستخدمها عشان ترسم لوحتك أنت وتوضح فكرتك للعالم. الرسام الشاطر لا بيضع كل الألوان اللي في العلبة على اللوحة عشان يثبت إن عنده ألوان كتير، الرسام بيختار درجات معينة تخدم فكرته وتبرز ملامح لوحته. ​عشان كده، حتى لو بتبني بحثك على ملاحظة مباشرة أو منهج استنباطي من بيئة عملك، انت برضه محتاج الدراسات السابقة (ألوانك) للأسباب دي: ​1. إبراز "شخصية الباحث" (بصمتك): الدراسات السابقة مش كمالة عدد ولا مجرد رصّ معلومات. من استعراضك للآراء المختلفة حول نقطة بحثك، بتظهر شخصيتك كباحث. لما تحلل رأي فلان، وتنقده، وتقارنه بمتغيراتك، بتكتشف "الفجوة البحثية" اللي محدش غيرك خد باله منها. هنا بتتحدد المساحة الفاضية في اللوحة اللي مستنية فرشتك إنت بالذات. ​2. الوقوف على أكتاف العمالقة: الإبداع مش إنك تبدأ من الصفر في الضلمة وتدعي إنك أول إنسان يكتشف المشكلة. العالم "إسحاق نيوتن" لخص جوهر العلم لما قال: ​"If I have seen further, it is by standing on the shoulders of giants." "إذا كنت قد رأيت أبعد من غيري، فذلك لأني أقف على أكتاف العمالقة". استخدم أدوات اللي قبلك عشان تشوف أبعد منهم. ​3. إثبات إنك مبتخترعش العجلة: إيه اللي يضمنلك إن المشكلة اللي إنت لاحظتها في شركتك، مفيش باحث تاني في بلد تانية لاحظها ولقالها حل عبقري من 5 سنين؟ قرايتك للي فات بتحميك من إنك تضيع سنين في اختراع عجلة موجودة بالفعل. عشان كده، من وجهة نظري التسلسل العلمي الصحيح لأي رسالة بيبدأ ب: 1️⃣​الملاحظة والشغف: عينك تلقط مشكلة (في شغلك، في مجتمعك، أو من قراءاتك لمن سبقوك). 2️⃣​استكشاف الألوان (الدراسات السابقة): تقرأ عشان تشوف مين حاول يحل المشكلة دي قبلك، ووقفوا لحد فين. 3️⃣​تحديد الفجوة (Gap): تلاقي الزاوية اللي محدش درسها. 4️⃣​صياغة المشكلة: تحدد أنت هتعمل إيه بالظبط. 5️⃣​وأخيراً. وليي آخرا😉. العنوان: اللي بيُصاغ بدقة عشان يعبر عن المشكلة والفجوة اللي أنت لقيتها. 🪥​امسك فرشتك صح، استكشف ألوانك بذكاء، وارسم لوحتك اللي هتضيف جديد للعلم! د. منى مصطفى العشري ✨️ #د_منى_مصطفى_العشري