Post by Dorra Baklouti
diplômée en mastère professionnel en ingénierie de management et métiers de conseil👩🏻🎓
في عالم الموارد البشرية… سمعت حكاية خلاتني نوقف ونفكر. فتاة تخرّجت من عامين ، دخلت تخدم في شركة بكل حماس. من نهارها الأول، ما كانتش تكتفي بتنفيذ خدمتها فقط… كانت تقترح، تطوّر، تصلّح، وتحاول تخلّي أثر في كل حاجة تشوفها تنجم تتحسّن. مع الوقت، بدات تبرز داخل فريقها، وخدمتها ولات تبان أكثر وأكثر… بعد فترة، تم استدعاؤها من طرف مسؤول الموارد البشرية. كانت متوقعة حديث على التطور، ولا على مسار مهني واضح داخل الشركة… أما الجملة اللي سمعتها كانت مباشرة: «بصراحة ننصحك… في الشركة هاذي ما عندكش برشا آفاق للتطور. كان تلقى فرصة خير، امشي على روحك.» صراحة… هذا النوع من الكلام ينجم يتقال بين أصدقاء ولا زملاء. أما وقت يخرج من شخص يخدم في الموارد البشرية، يولي عندو مفهوم مختلف. وهنا نبدأ نسأل: هل دور الـRH هو فقط يقول للموظف "إمشي"؟ ولا المفروض يكون جزء من الحلّ: يسمع، يفهم، ويحاول يحافظ على الكفاءات؟ وبصراحة، كـRH، في رأيي: الـRH موش مطالب يصنع المعجزات، وما ينجمش يغيّر كل واقع. أما على الأقل، دوره ما يكونش الشخص اللي يطفّي الحماس ويكسر الطموح. خاطر ساعات، الكفاءة ما تحتاجش شكون يقوللها "إمشي"… تحتاج فقط شكون يسمعها، يفهمها، ويحاول يدافع عليها. وفي الأخير، يبقى السؤال: إذا كان الموظف الطموح يضطر يخرج باش يلقى روحو… شكون اللي خسر فعلاً؟ الموظف اللي باش يلقى فرصة أخرى؟ ولا المؤسسة اللي فرّطت في واحد من أهم طاقاتها؟ من رأيي، الـRH الحقيقي موش الشخص اللي يعرف كيفاش يدير خروج الكفاءات… بل الشخص اللي يحاول قدر الإمكان يحافظ عليها. 💬 شاركوني آراءكم وتجاربكم: هل الصراحة في موقف كيف هذا تعتبر احترافية من الـHR، ولا كان المفروض يحاول يلقى حل قبل ما ينصح بالمغادرة؟ -Dorra Baklouti #HumanResources #TalentManagement #HRStrategy #Leadership #EmployeeExperience #CorporateCulture #DorraBaklouti #Tunisia🎙️
