Post by Aya Rady

أنا حقيقي بيلفت انتباهي الناس المجتهدة اللي بتعرف تعمل حاجات كتير أو اشتغلت في مجالات كتير، وبكون مبسوطة جدًا لما أتكلم معاهم. ومن حسن حظي إن أغلب اللي بيدخلوا معايا استشارات بيكونوا من الفئة دي... فلما باجي أبص على البروفايل ألاقيه كاتب مهارات وخبرات وتايتلز كتير... اللهم بارك. وأول فكرة جت في دماغك دلوقتي أكيد إن الشخصية دي فرصها أعلى لأنها بتعرف تعمل حاجات أكتر. لكن الواقع للأسف له رأي تاني... في علم النفس المعرفي فيه مفهوم اسمه Categorization بيقول إن المخ البشري بيحب يصنف الأشخاص والأشياء في خانات سريعة عشان يوفر مجهود التفكير. زي Muhammad Gawish تكنولوجيا Ahmed Hatem Eldib تسويق Khaled Elshahat AI وغيرهم كتير... هل الأشخاص دول مبيعرفوش يعملوا أي حاجة غير المجال ده؟ أكيد لا ولو دورت وراهم هتكتشف إن عندهم مهارات وخبرات أكتر بكتير من الكلمة الواحدة اللي الناس ربطتهم بيها. ولكن المخ البشري مش بيحتفظ بكل التفاصيل دي هو بيدور على إجابة سريعة لسؤال واحد الشخص ده أفتكره بإيه؟ أنت ممكن تكون بتعرف تعمل 10 حاجات لكن اللي هيخليك مطلوب في السوق إن الناس تفتكرك في حاجة واحدة واضحة... وده مش معناه إنك تقلل من نفسك أو تخفي باقي مهاراتك. بالعكس، معناه إنك تتذاكى وتختار الباب اللي الناس هتدخل منه عليك، لأن الناس لازم تعرفك الأول في شيء محدد، وبعدها تكتشف باقي إمكانياتك. طب لو حاولت تقدم كل حاجة من أول فترة في ظهورك؟ في الغالب هيبقى صعب جدًا إن حد يصنفك التصنيف اللي أنت عايزه أو حتى يفتكرك بسهولة. عشان كده من أهم الأسئلة اللي ممكن تسألها لمتابعينك كل فترة لما تسمع اسمي أو تشوف بوست ليا، إيه أول حاجة بتفكر فيها؟ الإجابة على السؤال ده بتكشف لك الصورة الذهنية الحقيقية اللي اتكونت عنك مش الصورة اللي أنت متخيلها. وصلت؟ 🤓