Post by Adyan Agha

من سنين، كنت أنا كمان هالطالبة المتدرّبة اللي بدها تلاقي فرصتها الأولى تتعرّف فيها على سوق العمل. هالنوع من البرامج كان أول احتكاك حقيقي إلي بالواقع المهني: كيف بتصير المقابلات، كيف التعامل جوّا بيئة الشغل، وكيف ممكن أفهم تخصصي بشكل عملي بعيد عن النظري. واليوم، صرت أنا موجودة بنفس البرنامج، بس من زاوية مختلفة تمامًا؛ كمشغّلة ومدرّبة للطلاب. ضمن برنامج تدريب طلاب السنة الأخيرة بتخصصهم الأكاديمي، بالتعاون مع Jerusalem Multidisciplinary College وبالتنسيق مع Nour Afghani .كان إلي شرف أرافق وأدرّب طالبين من تخصص الموارد البشرية . اللي بلمسه فعليًا من خلال المشاركة بهيك برامج هو أثرها الواضح على أكتر من مستوى. 🔹 على مستوى الطلاب: الموضوع مش بس تعلّم، الطلاب بخوضوا تجربة قريبة جدًا من الواقع المهني. بيتعرّفوا على آليات استقطاب المرشحين، وعمليات التقييم، ومراحل التوجيه المهني، وطبيعة بيئة الشغل اليومية. هالتجربة بتساعدهم يكتشفوا نقاط قوتهم، ويحددوا المهارات اللي لازم يطوروها، ويفهموا المجالات اللي فعلًا بتناسبهم لما يدخلوا سوق العمل. وكمان هالتجربة بتساهم بشكل كبير بتخفيف رهبة البداية، وبتعطيهم ثقة أكبر بحالهم وبقدرتهم يندمجوا ببيئة العمل. 🔹 على مستوى الشركات وأصحاب العمل: وجود طلاب متدرّبين بضيف منظور جديد ومختلف. أحيانًا أفكارهم البسيطة بتطلع حلول عملية، أو بتفتح طرق جديدة للتفكير وتحسين بعض الإجراءات. عشان هيك الفايدة مش بس للطلاب، كمان بتمتد لجهات العمل اللي بتتعلّم وبتتطوّر من خلال هالتجربة. 🔹 على المستوى المجتمعي: أنا مؤمنة إن مشاركة المشغّلين بهيك برامج مش مجرد استضافة طلاب، بل هي جزء من مسؤوليتنا المهنية والاجتماعية بتجهيز جيل أكثر جاهزية لسوق العمل، وأكثر وعي بطبيعة تخصصه ومتطلباته. وبتزيد أهمية هالشي لما يكون الحديث عن طلاب وخريجي القدس الشرقية، لأن الاندماج بسوق العمل بيمثّل تحدّي حقيقي لكثير منهم، وهاد بخلي هالفرص العملية خطوة مهمة باتجاه بناء مسار مهني أوضح وأكثر استقرارًا. بالنهاية، برامج التدريب العملي بتشكّل حلقة وصل حقيقية بين الدراسة الأكاديمية وسوق العمل، وبتخلق قيمة متبادلة ومتوازنة لكل الأطراف المشاركة فيها. #التدريب_العملي #الموارد_البشرية #سوق_العمل #التطوير_المهني #القدس_الشرقية