Post by Adeela - عديلة

١٠٩٥ يوم. ثلاث سنين. وما خلصت. على مدار حملة "١٠٩٥ يوم"، حاولنا نحكي ليكم قصة السودان بالأرقام. أرقام صعبة وموجعة، لكنها واقع أهلنا وشعبنا وأطفالنا. حاولنا نكسر حاجز الصمت البتلفّ حول أكبر أزمة إنسانية في العالم، ونوصّل صوت الناس الما قادرين يوصّلوا صوتهم بنفسهم. في المحور الأول من الحملة، حكينا عن النزوح. أكتر من ١٢ مليون إنسان سوداني فقدوا بيوتهم واضطروا يهربوا، بعضهم مرة ومرتين وثلاثة. حكينا عن وفيات تتجاوز ١٥٠ ألف ضحية، أغلبهم ماتوا بصمت بعيد من الكاميرات وعدسات الإعلام. ماتوا من الجوع، من المرض، من القتل الممنهج. وحكينا عن ٤٢ ألف طفل اتفصلوا من أهاليهم ومكشوفين لكل أنواع الخطر والاستغلال. في المحور التاني، وقفنا مع مستقبل أطفالنا. ١٧ مليون طفل وطفلة برا أسوار المدرسة. جيل كامل بفقد حقه في التعليم والمعرفة وهو بتفرج. المدارس اتحولت ثكنات عسكرية وملاجئ، والفصول الفاضية ملأت الشوارع بعمالة الأطفال والتجنيد القسري وزواج القاصرات. أطفال كان المفروض يشيلوا أقلام وكراريس، شايلين هموم ما هموم عمرهم. في المحور التالت، كشفنا وجه المجاعة والمرض. ٢٥ مليون إنسان بواجهوا شبح الجوع، والإنتاج الزراعي اتقلّص لـ ٣٥٪ بس. ٨٠٪ من المستشفيات خارج الخدمة، وأكتر من ٢٠٠ هجوم موثّق على مرافق طبية. ٤.٢ مليون طفل بعانوا من سوء التغذية الحاد، منهم ٨٠٠ ألف بواجهوا خطر الموت. الجوع والمرض بقوا سلاحين صامتين بيحصدو أرواح شعبنا كل يوم. وفي المحور الرابع، وثّقنا تدمير شرايين الحياة. محطات المياه، شبكات الكهرباء، أبراج الاتصالات. كل حاجة بتخلّي الإنسان يقدر يعيش ويتواصل ويشتري أكل لعيالو اتدمرت. وصور الأقمار الصناعية وثّقت حجم الدمار والفظائع في كل شبر من أرض السودان. الحملة برضو اتضمنت فيديو عن الموسيقى والفنون ما بعد ١٥ أبريل وكيف اتمظهرت الحرب واستقطاباتها في تعبيراتنا الفنية وموسيقانا البنسمعها وننتجها كسودانيين وسودانيات، وفيديو تاني بتكلم عن خطابات الكراهية الاتصدرت منصات التواصل في التلاتة سنين الفاتو ومساهمتها في زيادة الشق المجتمعي.  واخيراً اختتمنا الحملة بمشاركتكم تساؤلاتنا حول دور المجتمع في بناء السلام وعن الاثار النفسية واللحظات العاطفية الواجهتكم خلال ال١٠٩٥ يوم الفاتو. لو ما تابعت حملة "١٠٩٥ يوم" من البداية، ارجع لمنشوراتنا السابقة واقراها وشاركها. كل مشاركة بتكسر جزء من التعتيم، وكل صوت بيوصّل الحقيقة لشخص واحد زيادة ممكن يفرق. ثلاث سنين ونحن بنحيي ذكرى اندلاع الحرب في السودان. ثلاث سنين والألم هو هو، والأمل رغم كل شي ما مات. نتمنى من كل قلوبنا إنو السنة الجاية ما نحيي ذكرى رابعة. نتمنى نحتفل بوقف الحرب فعلاً. نحتفل بعودة أهلنا لبيوتهم، وأطفالنا لمدارسهم، وشعبنا لحياته الطبيعية. نحتفل بسودان بيتعافى وبيتبنى من جديد. السودان بستحق السلام، وشعبنا بستحق يعيش. #السودان  #حملة_عديلة_1095 #3_سنين_حرب #1095_يوم  #حرب_السودان #معاناة_انسانية  #عديلة